चुनाव रो टेम है

बांधा ला जीत रो सेहरो
जोरको चुनाव रो टेम है...
म्हारी बात गांठ बांधल्यो
लोगां न बस ओ ही बेम है..

म्हे ही अठे का चोधरी
बरसां बरस करां ला राज..
बतावे तो डूंगर का डूंगर
ढेला को करयो ना काज..

पहन लिया धोऴा कुर्ता
पगा में चरचराती मोजड़ी
जद निकऴ्यो राज रो घमंड है
पचे तो लागे जियां रोजड़ी

पकड़ कर नेता जी रो पल्लो
लोग बाग मजा काट रिया है
आज है काल रो काईं भरोसो
लपक लपक कर चाट रिया है

महे ही नेताजी रा लंगोटिया
गोडां सूधो है म्हारो राज
संभऴ ज्यो रे बावऴी बूंचो
बे थारा काल हुया ना ही आज
_____________________